湯馬士柏迪第3次奪得加納足球先生。

加納球星湯馬士柏迪同阿仙奴嘅合約月底屆滿，但續約遲遲未有聲氣，有消息指呢位中場下周將會飛返倫敦，就去留作出最後決定。湯馬士柏迪日前獲選為加納足球先生，隊友布卡約沙卡、威廉沙列巴等都有留言祝賀。

32歲嘅湯馬士柏迪上季表現出色，據報阿仙奴已向佢開出新約，但佢即將回復自由身，唔少球會都向佢招手。湯馬士柏迪目前身處加納，日前就出席頒獎禮，領取個人第3個加納足球先生獎項(2018、2019、2025)。

據英國傳媒報道，湯馬士柏迪下星期就會返倫敦，據報佢已收到AC米蘭同加拉塔沙雷斟介，不過佢首選仍然係留喺阿仙奴。阿仙奴部份球員同青年軍，將會喺7月初飛去西班牙進行集訓，湯馬士柏迪亦喺預計出發名單當中，意味阿仙奴對佢續約好有信心。